Wednesday, May 31, 2017

ஆஞா...!




கணபதியாப்பிள்ளை
என் அம்மா வழி தாத்தாவின் பெயர்!
நாங்கள் செல்லமாக "ஆஞா" என்றே அழைப்போம்!
80 களிலிருந்து அவரது இறுதி மூச்சு இருக்கும்வரை
ஆஞா எங்களுடன் எங்கள் வீட்டிலேயே தங்க வேண்டிய
சூழ்நிலை அவருக்கு ஏற்பட்டது!
அவர் எங்களுடன் இருந்த அந்த பத்து வருடங்கள்
எங்களால் அவ்வளவு சுலபமாய் மறக்க இயலாது!

நெடு நெடுவென உயரம்!
இருட்டுக் கறுப்பு நிறம் !
வெள்ளை வேட்டி வெள்ளை ஜிப்பா !
எந்த நேரமும் கைவிரலில் சிகரெட் !
அதன் சாம்பலை தட்டுவதற்கு
அலுமினிய ஆஷ் டிரே!
லொக்கு லொக்கு என இருமல் !
பச்சை பச்சையாய் சளி  என்று ஒரு அபூர்வ கலவைதான் ஆஞா !

24 மணி நேரமும்
"பிள்ளையாரப்பா, ஸ்ரீ ராமஜெயம் " என இறைவன் நாமத்தையோ
அல்லது "தனலக்ஷ்மி தனலக்ஷ்மி "
என இறந்துபோன மனைவியின் பெயரையோ
முணுமுணுத்துக் கொண்டே இருப்பார்!
அம்மாவிற்கு ஏதோ தன்னால் ஆன
உதவிகளை செய்து கொண்டிருப்பார்!
எங்கள் பாடப் புத்தகங்களுக்கு அட்டை போட்டுக் கொடுப்பார் ;
காய்ந்த துணிமணிகளை அழகாய் மடித்து வைப்பார்!
தினமும் மாலை மலைக்கோட்டையை சுற்றி வருவார் ;
கருப்பண்ண சாமி, மாணிக்க விநாயகர் சன்னதி,
சங்கடம் தீர்க்கும் விநாயகர், தெப்பக்குளம் ஆஞ்சநேயர்
வானப்பட்டறை மாரியம்மன் கோவில்
என ஒரு கணக்கு வைத்திருப்பார்!
வேஷ்டியின் ஒரு முனையை கைகளின் இடையில்
பிடித்துக் கொண்டே நடப்பார்!

ஒரு நாளின் பல சமயங்களில் மனைவியை நினைத்துக் கொண்டே
கண்களில் கண்ணீர் வழிய விட்டுக் கொண்டிருப்பார்!
அவரது உள்ளங்கைகள் மயிலிறகு போல் மென்மையாய் இருக்கும்!
தமிழில் பண்டிதர், ஆனால் ஆங்கில பாண்டித்தியமும் உண்டு!
காவல் அலுவலகத்தில் மேலாளர் பதவி வகித்தவர்!
கையெழுத்து கண்களில் ஒத்திக் கொள்ளும்படி இருக்கும்!
மாதம் தவறாது தன் மனைவியின் சமாதிக்கு
மிதிவண்டியில் சென்று வருவார் !
பிரதி மாதம் அவருக்கு பென்ஷன் வரும்!
அதனை வாங்கச் செல்லும்போதெல்லாம்
எங்களுக்குப் பிடித்தமான இனிப்புகளையும் வாங்கி வருவார்!
தையல் கடை தாத்தா, சின்னா சித்தப்பா, எத்திராஜ் அக்கா
என சில பெயர்கள் அவர் பலமுறை உச்சரித்தது  மிகப் பிரபலம் !
அப்பாவுக்கு கோபம் வரும் போதெல்லாம்
எங்களை குறிப்பாக 'என்னை' அவரிடமிருந்து
காப்பாற்ற ஆஞாவின் தயவு எனக்கு பெரிதும் உதவிற்று எனலாம்!
அம்மா எப்பொழுதும் எங்களுக்காக
ஓடி ஓடி வேலை பார்ப்பதை காணப் பொறுக்காமல்
"எப்பம்மா உனக்கு விடிவு காலம் பிறக்கும்"
என அங்கலாய்த்துக் கொண்டே  இருப்பார்!

முழுவதும் இயங்கி கொண்டிருந்தவர்
திடீரென ஒருநாள் மதிய உணவு முடிந்ததும்
நாற்காலியில் சற்று ஆசுவாசமாய் அமர்ந்தவர்
அடுத்த சில மணித் துளிகளில்
தன இஷ்ட தெய்வமான மலைக்கோட்டை பிள்ளையாரை
நோக்கியபடியே இறுதி மூச்சை விட்டார் !
யாருக்கும் எவருக்கும் ஒரு சிறு உயிருக்கும்
தீங்கு நினைத்திராத அவரது நல்ல உள்ளத்திற்கு
மரணமும் அவர் விரும்பியபடியே வந்தது!

சிறு பிள்ளைகளாய் இருக்கும் பொழுது
வீட்டிற்கு ஒரு பெரியவர் கூட இருப்பதும்
அவரை நாம் பார்த்துக் கொள்ளுவதும்
நம்மை அவர் பார்த்துக் கொள்ளுவதும்
அவர் சொல்லி கதைகள் கேட்பதுவும்
அவர் அருகாமை தரும் தைரியமும்
ஒவ்வொருவரும் கண்டிப்பாக அனுபவிக்க வேண்டிய ஒன்று!

இன்று ஜூன் ஒன்றாம் தேதி !
அவர் மரணம் தழுவிய நாள்!
அவர் பற்றிய இந்த பதிவை எழுதியதன் மூலம்
அவர்தம் நினைவுகளில் மூழ்கிப் போனதில்
இன்னும் சிறு பையனாகவே இருந்து கொண்டு
வாயார "ஆஞா, ஆஞா" என்று அழைத்துக் கொண்டு
இருக்க மாட்டோமா என்று ஏங்கியபடியே முடிக்கின்றேன் !

மணிகண்டன் பா
















Sunday, May 21, 2017

திருச்சிராப்பள்ளி - சரித்திரம் சொல்லும் பூகோளம் !



 நான் பிறந்து, தவழ்ந்து, வளர்ந்து, இருந்த மண்!
அதன் வாசம், நேசம், தாக்கம், இல்லாமல் நான் இல்லை!
அதனைப் பற்றிய நினைவுகளில் லயிக்கும் போதெல்லாம் 
ஏதோ ஒரு இனம் புரியாததோர் சிலிர்ப்பு!

ஒரு மண்ணின் பெருமையினை 
அதன் பாரம்பரியமும், கலாச்சாரமும் தான் பறைசாற்ற வேண்டும் என்பதில்லை!
அனுபவித்த விஷயங்களை, பழகிய மனிதர்களை, புழங்கிய இடங்களை 
ஒற்றைச் சொற்கள் மூலமும் கூட விளக்கிட இயலும்!

அவ்வகையில்
நான் இருந்த காலகட்டத்தில்,
1985 - 1994 வருடங்களில்,
நானும் என்னைச் சார்ந்தோரும் பிரயோகித்த ஒற்றை வார்த்தைகளின் 
தொகுப்பை இங்கே வழங்குகிறேன்!
படித்துப் பாருங்கள்!
ஒவ்வொரு வார்த்தையும் ஒவ்வொரு குட்டி சரித்திரம்! 
அது எங்களுக்கு மட்டுமே புரியும் ஒரு பூகோளம்!

(
பொறுப்புத்துறவல் :  பதிவின் நோக்கம் எவரையும் புண்படுத்துவது அல்ல
  
·      மைக்கேல்ஸ் ஐஸ்கிரீம் 
·      சங்கர விலாஸ் 
·      கிணத்தடி 
·      மலையாளத்தான் கடை 
·      ராஜா கறிக் கடை 
·      வீராசாமிக்கடை 
·      நிக்க வைக்கிறவன் 
·      செந்தில் ஸ்டோர்ஸ் 
·      கோபாலு 
·      இட்லிக்காரம்மா 
·      மூக்கொழுவி 
·      பாப்பாக்கா பாலி 
·      மதுரா லாட்ஜ் 
·      ரமா கஃபே 
·      செக்கடி சந்து 
·      தேர் முட்டி
·      பிட்சை சலூன் 
·      காடி கானா சந்து 
·      பள்ளி கொண்டான் 
·      டவுன் ஸ்டேசன் 
·      நன்றுடையான் கோவில் 
·      மதுரா லாட்ஜ் 
·      தாத்தா தையக்கடை 
·      கோமுட்டி
·      மாவுக்காரங்க 
·      எத்திராஜ் அக்கா 
·      அலி கடை 
·      பங்காரு 
·      ஜெயம் டீச்சர் 
·      பூசாரிக்கடை 
·      அஜந்தா 
·      அச்சாபீஸு 
·      காந்தம் 
·      சுப்பிரமணி
·      தனத்து மகன்
·      மஞ்ச சேலை 
·      சங்கடம் தீர்க்கும் விநாயகர் 
·      நாமக்காரன் 
·      சாரி டாக்டர் 
·      செல்வராஜ் சார் 
·      சேகர் சார் 
·      பாப்பாக்கா
·      கோரி
·      பால்காரம்மா 
·      கண்ணாக்கா
·      புஸ்பாக்கா 
·      முருகாண்ணே 
·      நியாஸ்
·      மாரிஸ் தியேட்டர் 
·      ரம்பா ஊர்வசி 
·      சித்துக்கண் மாரி 
·      புதுப்பட்டி சந்து 
·      லலிதா மெடிக்கல்ஸ் 
·      ஜெயபால் கனகராஜ் 
·      சாணியாங்குளம் 
·      சவுக்கு
·      சிந்தாமணி 
·      கெளுத்தி மீசை 
·      வாணப்பட்டறை 
·      ஆரியன்ஸ் ஸ்கூல் 

பட்டியல் நீளம் காரணமாக குறைக்கப்பட்டிருக்கிறது!
இன்னும் விடுபட்டவை ஏராளம்!

- அன்பன் மணிகண்டன் 








Friday, May 5, 2017

ஸ்ருதி !



பூவை பறித்தால் தான் என்றில்லை,
பறிக்காமல் போனாலும் வாடித் தான் போகும்!

பூச்சூடும் பாவை உன் முகம் மட்டும்
உயிர் பறிக்கப்பட்டும் வாடாமல் இருப்பதென்ன?

எதை மறைத்தாய் எதை புதைத்தாய் ஆள் மனதில் புரியவில்லை!
உனைப் புதைக்க இன்று கூடியுள்ளோம் காரணம் தெரியவில்லை!

பருவப் பெண் நீ சாகும் பருவமா இது!
உருவக் குறைச் சொல்ல உன்னிடத்தில் இருப்பது தான் ஏது!

தெய்வக் குழந்தையடி உன்னை பறி கொடுத்து
தெய்வக் குற்றம் ஆனதென்னை?

கள்ளம் கபடம் இல்லா உன் சிரிப்பை காலன்
கொள்ளை கொண்டு போனதென்ன?

யார் செய்த பிழைக்கோ நீ வந்து பிறந்தாய்!
ஊர் செய்த பிழைக்கு உன் உயிரையும் துறந்தாய்!

நாகரிகக் கோமாளிகள் வாழும் இவ்வுலகில்
நாகரிகம் சற்றே மறந்திருந்தாய்!

கண்ணில் ஆயிரம் கனாக்களுடன் எங்களைச் சுற்றி சுற்றி வந்தாய்!
வண்ணத்துப்பூச்சி போல் சிறகடித்து எங்கோ பறந்து சென்றாய்!

மண்ணுக்கு மரம் பாரமா இல்லை நிழல் தான் பாரமா !
யாருக்கு நீ பாரம் என எங்களைத் தவிக்க விட்டாய் பாரம்மா !

காலங்கள் கனியும் உன் கோலங்கள் மாறும் என்று காத்து இருந்தோம்!
கோலங்கள் அழியத்தான் வேண்டும் என்று விதி மதித்து
சொல்லாமல் சொல்லிச் சென்றாயோ?

மனிதம் மறந்து  புனிதம் அடைந்தாய்!
மானுடத்தின் இறுதி வரை, ஸ்ருதி நீ வாழ்வாய்!
இறைவியாயிருந்து இனி உன் குடும்ப நலன் காப்பாய்!
வாழ்க உன் நாமம்!




















Tuesday, February 7, 2017

விண்ணைத் தாண்டி வருவாளா?

தங்க நிலா...!
கும்மிருட்டு...!
முடிவிலா பாதை!
பயணம் வெகுதூரம் ....!
கைகோர்த்து செல்ல
தேவை ஒரு காதலி !
அவள் விண்ணைத் தாண்டி வருவாளா??
இவ்விரவின் நிசப்தம்தனை
தன் பெருமூச்சுக் காற்றால் கலைப்பாளா?
காத்திருக்கிறேன்!
யாருக்குத் தெரியும் ??!!
சற்று நேரத்தில்
நிலவின் கதவு திறக்ககலாம்...!
என்னவள் அதிலிருந்து தோன்றலாம்!
நம்பிக்கை தானே வாழ்க்கை!

Wednesday, January 18, 2017

புரட்சி வெடிக்கட்டும்!



இதோ ஒரு புரட்சிக்கான விதை விதைக்கப்பட்டுக்கொண்டிருக்கிறது !
ஒரு எழுச்சிச்சிக்கான முன்னோட்டம் விரியத் தொடங்கியிருக்கிறது!
மாற்றத்திற்கான அச்சாரம் போடப்பட்டுக் கொண்டிருக்கிறது!
தமிழன் இனியும் இளிச்சவாயன் இல்லை
என உலகம் உணரத் துவங்கிவிட்டது!
தமிழன் குட்ட குட்ட குனியும் மானெங்கெட்டவனில்லை
என பாரே பார்க்கத் தயாராகிவிட்டது!
தமிழனின் கலாசாரத்தைப் பாதுகாக்க இனி யாரும் தேவையில்லை
என வீரத் தமிழனின் பிள்ளைகள் அகிம்சை வழியில்
தானே தன்னெழுச்சியாய் புறப்பட்டு விட்டனர்!
"சல்லிக்கட்டு" எனும் ஒரு ஒற்றைப்புள்ளியில் குவிந்து
இன்று மாற்றத்தை நோக்கி இளைய சமுதாயம்
வீறு நடை போட்டுக் கிளம்பி விட்டது!
"ஏறு தழுவுதல்" ஏதோ தமிழனின் பாரம்பரிய விளையாட்டு மட்டுமில்லை
சமூக அவலங்களை தட்டிக் கேட்க தன்னை தயார்படுத்தும்
"மல்லு கட்டுதல்" என்றோ நினைக்க தோன்றுகின்றது ?
மீசை வைத்த பாரதி வாழ்ந்த தேசத்தில்
இன்னும் ரோசம் மிஞ்சி இருக்கத்தான் செய்கிறது!
நாளையின் விடியல் நமக்கு நல்ல சேதியைத் தரட்டும்!
புரட்சியின் வீரியம் எங்கெங்கும் பரவட்டும்!
வாழ்க தமிழன் பண்பாடு!  வெல்க அவனது சீரிய நோக்கம்!




Monday, October 24, 2016

தோழர் முரளி ...!


தோழர் முரளி ...!

மிஞ்சிப் போனால் என்ன ஒரு வருடம் இருக்குமா..?
எனக்கு அவரும்; அவருக்கு நானும் அறிமுகமாகி...!
ஏதோ பல வருடப் பழக்கம்போல் உணர்வு மேலிடத்தான் செய்கிறது,
ஒவ்வொரு முறை அவரிடத்து பேசும் போதும், பழகும் போதும்!

நண்பர்கள், நல விரும்பிகள் என எல்லோரையும் போல
சிநேகிதர்கள் பலர் என் வாழ்க்கையிலும் வந்து போனாலும்,
பெரியதாய் சொல்லிக் கொள்ளும் படியாக
ஒரு நட்பு வட்டாரம் எனக்கு இருப்பதாகத் தெரியவில்லை!
அதற்கு காரணமாக இந்தத் தலைமுறை சங்கடங்களை
குற்றம் சொல்வதா இல்லை சொல்லாமல் விடுவதா? புரியவில்லை !
பால்ய காலத்திலிருந்தே விரல் விட்டு
எண்ணி விடும் அளவுக்குத் தான் நண்பர்கள்  எனக்கு!
பள்ளி பிராயத்திலிருந்தே, நண்பன் ஜோ!
கல்லூரி காலத்திலிருந்து, நண்பன் பிராங்க்ளின்,
பணியிடத்தில், நண்பர் ராஜேஷ்!
இப்பொழுது வசிப்பிடத்தில் தோழர் முரளி!

எங்களது முதல் சந்திப்பு,
இன்னும் எனக்கு பசுமையாய் நினைவிருக்கிறது...!
அது ஒரு சிறு தூறல் பெய்து கொண்டிருந்த முன்பனிக் காலம்!
வசிக்கும் குடியிருப்பின் பொதுப் பணிகளில்
என்னை அதிகமாய் ஈடுபடுத்திக்கொண்டிருந்த காலம்!
கண்காணிப்பு குழுவுடன் தீவிர விவாதத்தில் நான்!
கண்களில் எச்சரிக்கையும், நடையில் அமைதியும், தோற்றத்தில் ஆளுமையும் என கலவையாய்
கைகளில் குடையுடன் அவர்!
ஓரிரு வார்த்தைகள் பேசியிருப்போம்!
எங்களுக்கும் பரஸ்பரம் புரிந்து கொள்ள
அந்த ஓரிரு வார்த்தைகள் போதுமானதாக எங்களுக்குள்
சங்கேதப் பரிமாற்றம்தனை  அரங்கேற்றியிருக்க வேண்டும்!
அதுவும் எங்களுக்கும் அறியாமலேயே ஏற்பட்டிருக்க வேண்டும்!

அதைத் தொடர்ந்து,அவரது துணைவியாரிடத்து
என் மகன் கணிதப்பாடம் சொல்லிகொள்ள சென்றதும்,
குழந்தைகள் தின விழாவில்,
அவர்கள் இருவரையும் தம்பதி சமேதம் தலைமை தாங்க நான் அழைத்ததும்,
குடியிருப்பு பொது விவாதங்களில் எங்கள் இருவரது கருத்துகளும்
ஒரே அலைவரிசையில் பயணிக்கத் தொடங்கியதும் என
இப்படி பல்வேறு ஞாபகங்கள்
இந்த ஒரு வருடத்தில் ஒவ்வொன்றாய் என்னுள்
பிரளயமாய் புறப்பட ஆயத்தமாகிறது!
எல்லாவற்றிற்கும் மகுடம் வைத்தது போல
அமைந்தது தான் அவரது அறுபதாம் பிறந்த நாள் விழாவும்
அந்த விழாவில் அவர் எழுதி வெளியிட்ட
இரு ஆங்கிலப் புத்தகங்களின் வெளியீடுகளும் !
விழாவைத் தொகுத்து வழங்க அவர் என்னை
அன்பாய் கேட்டுக் கொண்டதும்!
எங்களுக்குள் புலரத் துவங்கியிருந்த புரிதலுக்கு
மற்றுமொரு முத்தாய்ப்பான வாய்ப்பாக
அந்த நிகழ்வு யதார்த்தமாய் நடந்தேறியது!

தோழமை என்பது வயது பாராதது!
பின்புலம் ஆராயாதாதது !
இனம், மொழி, பேதமை அறியாதது!
அது எங்கோ, எதிலோ எப்புள்ளியிலோ துளிர்ப்பது!
அன்பை மட்டுமே பிரதிபலன் பாராமல் பரிமாறிக் கொள்ளச் செய்வது!
நட்பை மாத்திரம் சுயநலமின்றிக் போற்றி பாராட்டுவது!
அந்த உணர்விற்கு உருவகம் கொடுக்க இயலாது!
அனுபவிக்க மட்டுமே இயலும்!


தோழர் முரளி உடன் கூட,
புதிதாய் துவங்கியிருக்கும் நட்பெனும் எனது பயணம்
இனிவரும் காலங்களில் இன்னும்
பல்வேறு பரிணாம வளர்ச்சியடையும்
என்பதில் அசைக்க முடியாத நம்பிக்கை உள்ளவனாகனாக
இதோ, நாளைய விடியலின் பாதையில்  பயணிக்க முற்படுகிறேன்!


































Friday, July 29, 2016

கபாலி



வெகுஜன, இணைய, பத்திரிக்கை மற்றும் வாய்ச்சொல்
விமர்சனங்களை புறந்தள்ளிவிட்டு
திறந்த மனதோடு கபாலி படம் பார்க்க நேற்றுச் சென்றிருந்தேன்!
கனத்த மனதோடு திரும்பி வந்தேன்!

இப்படி ரஜினியைப் பார்த்து தான்
எவ்வளவு நாளாயிற்று!
சிறையில் புத்தகம் படிப்பதில் துவங்கி
இறுதியில் நிறைவாய் தன் குடும்பத்தினருடன்
மனதிற்குப் பிடித்தமான வாழ்க்கையைத் வாழத் துவங்கும் வரை
எவ்வளவு இயல்பாய், நேர்மையாய், யதார்த்தமாய்
அந்த கதாபாத்திரம் பயணிக்கிறது!!
"தன் அன்பு மனைவியைத் தேடுதல்"
எனும் ஒற்றை நோக்கத்திலிருந்து துளியும் பிறழாமல்
கண்ணில் தேடலையும் நெஞ்சில் வலியையும்
நடை உடை பாவனையில் மிடுக்கையும் தவற விடாது
அடுத்தடுத்த காட்சிகளில்
தன்னுடன் இருப்பவர்கள் முதல்
தன்னை திரையில் பார்க்க வந்திருக்கும் ரசிகர்கள் வரை
அனைவரையும் தன்னோடு அரவணைத்துச் செல்ல
வைத்திருக்கும் படியான ஒரு ஈர்ப்பினை
படத்தின் ஜீவநாடியாய் உலவ விட்டிருப்பத்தில்
இயக்குனர் பா ரஞ்சித் தன்னை அடுத்த கட்டத்திற்கு
எடுத்துச் சென்றிருப்பதில் வெற்றியும் கண்டிருக்கிறார்
என்றால் அது மிகையில்லை!

இது ரஜினி படமா இல்லை ரஞ்சித்தின் படமா என்றால்
என்னைப் பொறுத்த வரையில் இது ஒரு நல்ல படம்!
ரஜினியை அவரது வயதொத்த கதாபாத்திரமாய்
வாழச் செய்திருக்கும் ஒரு அரிய படம்!
எவ்வித எதிர்பார்ப்புகளுடன் இல்லாது சென்று வந்தால்
இது ஒரு மிகச் சிறந்த வெற்றிப் படம்!
















ஆஞா...!

கணபதியாப்பிள்ளை என் அம்மா வழி தாத்தாவின் பெயர்! நாங்கள் செல்லமாக "ஆஞா" என்றே அழைப்போம்! 80 களிலிருந்து அவரது இறுதி மூச்சு...